ប្រែសម្រួល៖ ប្រុសស្អាត

គីម កាដាសៀន( Kim Kardashian) បានបង្ហាញរូបរាងដ៏ស្រស់ស្អាតរបស់នាងក្នុងឈុតហែលទឹកទាន់សម័យ ខណៈកំពុងលេងរលកទឹកក្នុងអំឡុងពេលថតរូបយ៉ាងរីករាយនៅឆ្នេរសមុទ្រក្នុងទីក្រុងឡូសអានជឺលេស, សហរដ្ឋអាមេរិកនាសប្តាហ៍នេះ។

ស្ថាបនិកក្រុមហ៊ុន SKIMS វ័យ ៤៤ ឆ្នាំ – ដែលទើបតែត្រូវបានគេឃើញថតឈុតសម្រាប់ស៊េរី All’s Fair របស់លោក Ryan Murphy – បានបង្ហាញកាយវិការយ៉ាងស្រស់ស្អាតនៅលើឆ្នេរខ្សាច់ក្រោមពន្លឺព្រះអាទិត្យភ្លឺចែងចាំង។

ម្តាយកូនបួននាក់រូបនេះបានជ្រើសរើសខោបីគីនីពណ៌ខៀវភ្លឺមានខ្សែចង និងអាវបីគីនីពណ៌សស្រទន់មានក របាំងទ្រូងជ្រៅ។

សក់វែងខ្មៅរបស់នាងត្រូវបានបែកផ្នែកកណ្តាល ហើយហូរចុះក្រោមយ៉ាងធម្មជាតិហួសស្មា។

កាដាសៀនបានជ្រើសរើសការតុបតែងមុខរបៀបធម្មជាតិសម្រាប់ថ្ងៃសំខាន់នេះ ដោយប្រើបបូរមាត់ពណ៌ស្រអាប់។

តារាស្រីរូបនេះបានញញឹមយ៉ាងសប្បាយរីករាយ ខណៈដើរចូលទៅក្នុងទឹកសមុទ្រដែលមានរលកបោកបក់ជុំវិញខ្លួននាង។

នៅពេលមួយ គីមបានមុជចូលទៅក្នុងទឹករាក់ ខណៈក្រុមការងារព័ទ្ធជុំវិញនាង ហើយនាងក៏បានឈប់ថតរូបជិតៗខ្លះពេលខ្លួនទទឹកជោគ។

ក្រោយមក នាងបានថតរូបបន្ថែមខណៈអង្គុយលើខ្សាច់ក្តៅក្បែរម៉ូតូទឹកធំមួយពណ៌ខៀវ និងបៃតង។

តារាល្បីរូបនេះត្រូវបានគេឃើញកាលពីដើមខែនេះក្នុងការថតរូបនៅឆ្នេរសមុទ្រដ៏សិចស៊ីមួយដែលធ្វើឡើងនៅប្រទេសបាហាម៉ាស។

នៅពេលនោះ តារាស្រស់រូបនេះស្លៀកពាក់ឈុតបីគីនីលាយខ្លាខ្ទីង ហើយបានលាបប្រេងលើខ្លួនមុនពេលអង្គុយលើខ្សាច់សម្រាប់ថតរូបបន្ថែម។

ទាក់ទងនឹងរបៀបថែរក្សារាងកាយ តារាកម្មវិធី The Kardashians រូបនេះតែងតែបង្ហោះរូបភាពខ្លួននៅក្នុងសាលហាត់ប្រាណលើបណ្តាញសង្គម។

កាលពីឆ្នាំមុន គ្រូបង្វឹកផ្ទាល់ខ្លួនរបស់នាងឈ្មោះ Senada Greca បានចូលរួមក្នុងកម្មវិធីផតកាស់ On Purpose របស់លោក Jay Shetty ហើយបាននិយាយអំពីរបបហាត់ប្រាណរបស់តារាល្បីរូបនេះ។

“រឿងមួយដែលខ្ញុំបានរៀនអំពីគីមតាមរយៈការហ្វឹកហាត់ជាមួយនាង គឺការប្តេជ្ញាចិត្តរបស់នាង។ នាងមកដល់ទាន់ពេលវេលា និងត្រៀមខ្លួនរួចរាល់” នាងបានបង្ហើបនៅក្នុងកម្មវិធីនោះ។

“នាងមិនដែលត្អូញត្អែរ ឬថយក្រោយពីអ្វីដែលខ្ញុំឲ្យនាងធ្វើឡើយ ហើយខ្ញុំឲ្យនាងធ្វើច្រើនណាស់។ នាងមិនដែលថយក្រោយទេ។ នាងតែងតែប្រឹងប្រែងធ្វើឲ្យបានសម្រេច។”

Melissa Alcantara – ដែលពីមុនជាគ្រូបង្វឹកផ្ទាល់ខ្លួនរបស់គីម – បានប្រាប់ទស្សនាវដ្តី Women’s Health កាលពីឆ្នាំ ២០១៨ ថា តារារូបនេះគឺជា “អតិថិជន និងកីឡាការិនីល្អបំផុតដែលអ្នកអាចមាន។”

“វាគ្រាន់តែជាការជំរុញចិត្តរបស់នាង។ នាងដឹងពីអ្វីដែលនាងចង់បាន ហើយនាងត្រូវតែធ្វើវាឲ្យបានសម្រេច។ នាងគិតថា ‘ខ្ញុំត្រូវតែហាត់ប្រាណ នេះជាផ្នែកមួយនៃជីវិតរបស់ខ្ញុំ’ វាទាំងអស់គឺអាស្រ័យលើគំនិត។”

ហើយនៅឆ្នាំ ២០១៩ Melissa ក៏បានពន្យល់ទៅកាន់ទស្សនាវដ្តី People ថា ការហាត់ប្រាណរបស់គីមផ្តោតច្រើនទៅលើការបង្កើនសាច់ដុំជាងការកាត់បន្ថយទម្ងន់។

“នាងមិនចង់ស្គមពេកទេ។ នាងចង់មានសាច់ដុំ និងមានអារម្មណ៍ថាខ្លាំង។ ហើយនាងចង់រកឃើញអ្វីមួយដែលនាងអាចធ្វើបានពេញមួយជីវិត។ ខ្ញុំយល់ទាំងស្រុងពីគោលបំណងរបស់នាង។”

ខណៈកំពុងរវល់ជាមួយកាលវិភាគមមាញឹក អ្នកជំនួញរូបនេះបានប្រកាសពីកិច្ចសហការថ្មីរវាង SKIMS ជាមួយ Nike នាសប្តាហ៍នេះ។

នៅលើទំព័រ Instagram ចម្បងរបស់នាង នាងគ្រាន់តែបានចែករំលែករូបភាពនិមិត្តសញ្ញា Nike និង SKIMS នៅក្បែរគ្នាមុនពេលការបើកដំណើរការពិសេសនៅចុងឆ្នាំនេះ។

នៅក្នុងចំណងជើងរូបភាព តារាទូរទស្សន៍រូបនេះបានសរសេរទៅកាន់អ្នកតាមដានរបស់នាងចំនួន ៣៥៧ លាននាក់ថា៖ “សូមណែនាំ NikeSKIMS។ ម៉ាកថ្មីមួយដែលនឹងមកដល់នៅរដូវផ្ការីកនេះសម្រាប់អ្នកស្រលាញ់រាងកាយ។ រចនាឡើងដើម្បីកែរូបរាង និងបង្កើតឡើងដើម្បីដំណើរការល្អ។”

យោងតាមទស្សនាវដ្តី Elle សម្លៀកបំពាក់ហាត់ប្រាណ និងស្បែកជើងគឺជាផលិតផលមួយចំនួនដែលអតិថិជនអាចរំពឹងថានឹងរកឃើញនៅក្នុងកូឡិកសិននេះ។

“កិច្ចសហការនេះគឺជាលទ្ធផលនៃចក្ខុវិស័យរួមនោះ ដោយផ្តល់ជូននូវផលិតផលដែលត្រូវបានរចនាយ៉ាងល្អិតល្អន់ដើម្បីកែរូបរាង និងដំណើរការសម្រាប់រាងកាយគ្រប់ប្រភេទ” កាដាសៀនបានថ្លែងនៅក្នុងសេចក្តីថ្លែងការណ៍នោះ។

តារារិយ៉ាលីធីរូបនេះបានបន្ថែមថា “គ្រប់ព័ត៌មានលម្អិតទាំងអស់ត្រូវបានយកចិត្តទុកដាក់ និងពិចារណាយ៉ាងប្រុងប្រយ័ត្ន។”

ប្រធានផ្នែកអតិថិជន ផលិតផល និងម៉ាករបស់ Nike លោកស្រី Heidi O’Neill ក៏បានថ្លែងថា “យើងមានការរំភើបចំពោះឱកាសក្នុងការបង្កើតម៉ាកថ្មី និងផ្លាស់ប្តូរវិស័យនេះសម្រាប់កីឡាករជំនាន់ក្រោយជាមួយ NikeSKIMS។”

“យើងនឹងអញ្ជើញកីឡាករកាន់តែច្រើនឱ្យចូលរួមក្នុងកីឡា និងចលនាជាមួយនឹងផលិតផលដែលធ្វើឱ្យពួកគេមានអារម្មណ៍ខ្លាំង និងទាក់ទាញ។”

អ្នកវិភាគផ្នែកលក់រាយ Krista Corrigan នៃក្រុមហ៊ុន EDITED បានលើកឡើងថា ទាំងគីម និងម៉ាកសម្លៀកបំពាក់កីឡានឹងទទួលបានផលប្រយោជន៍តាមរយៈភាពជាដៃគូនេះ។

“ខណៈពេលដែល Nike មានឱកាសក្នុងការប្រើប្រាស់តម្លៃម៉ាក និងការគាំទ្រដ៏ខ្លាំងក្លារបស់ Skims ការផ្លាស់ទីនេះក៏អនុញ្ញាតឱ្យ Skims ចូលទៅក្នុងវិស័យកីឡាក្នុងលក្ខណៈកាន់តែហ្មត់ចត់ផងដែរ” Corrigan បានពន្យល់។

កាលពីថ្ងៃសុក្រនេះ គីមត្រូវបានគេឃើញស្លៀកពាក់ឈុតសំពត់ពណ៌ប្រផេះទាន់សម័យ ខណៈកំពុងសម្តែងតួនៅលើឆាកនៃស៊េរីរឿងច្បាប់ដែលទន្ទឹងរង់ចាំ All’s Fair របស់លោក Ryan Murphy។

តារាផ្សេងទៀតដែលត្រូវបានជ្រើសរើសសម្រាប់គម្រោងដែលគេរង់ចាំនេះរួមមាន Naomi Watts, Niecy Nash, Glenn Close, Sarah Paulson, Teyana Taylor និង Matthew Noszka។

រឿងនេះនិយាយអំពីក្រុមមេធាវីការពារក្តីលែងលះដែលសុទ្ធតែជាស្ត្រី ដែលមានមូលដ្ឋាននៅទីក្រុងឡូសអានជឺលេស។

ការផលិតរឿង All’s Fair បានចាប់ផ្តើមកាលពីខែតុលាឆ្នាំមុន ប៉ុន្តែកាលបរិច្ឆេទចេញផ្សាយជាផ្លូវការមិនទាន់ត្រូវបានប្រកាសនៅឡើយទេ។

កាដាសៀនមិនមែនជាអ្នកថ្មីក្នុងការសហការជាមួយលោក Murphy ទេ ដោយនាងបានសម្តែងតួក្នុងកម្មវិធីរបស់គាត់ American Horror Story: Delicate នៅឆ្នាំ ២០២៣៕